Floreagako Salestar Ikastetxeak eta Gurasoen Elkarteak, Azkoitiko Udalaren babespean, XXV. Euskal Kultur Jardunaldiak antolatu ditu aurtengo udaberrirako. On Bosco aretoan eskaini diren hitzaldietan eta bertso saioan jende ugari izan da. Esan daiteke jardunaldi arrakastatsuak izan direla!!
Juan Carlos Pérez musikari ospetsuak eman zien hasiera XXV. Kultur Jardunaldiei, martxoaren 6an, Floreagako On Bosco aretoan, “Nire esperientzia musikala (1974-2014)” izenburuko hitzaldi – entzunaldiarekin. 50 lagun inguru hurbildu ziren aretora. Juan Carlosek bere esperientzia musikalaren berri eman zigun, audizio aukeratuez lagundurik (Led Zeppelin, Ezekielen ametsa; Zea Mays Hilzori II, Bob Dylan, J.S. Bach, Cuarteto de cuerda No 1, Bizkaieraz, Itoiz suite, …). Ibilibide oparoa, hasierako rockarekiko miresmenetik, musika klasiko konposatzera … Juan Carlosek sendo adierazi zituen hiru gauza:
– musikarengan sinesmena, alegia, musikak pertsonengan duen eragin sakonean,
– aukera berriak aztertzeko premia
– beti ikasten jarraitzeko asmoa
Emanaldia bikaina izan zen.
Juanjo Etxeberriak, Loiolako Jesuiten probintzialak, “Elizaren eragina gaurko gizartean” izenburuko hitzaldi bikaina eskaini zuen martxoaren 13an, 80 inguru entzuleren aurrean. Gaia lantzeko, Jesuiten izaera eta esperientziako ezaugarri batzuk eta Frantzisko aita santuaren pentsatzeko eta jokatzeko modua izan zituen oinarri.
Gure gizartearen espazio gatazkatsu nagusiak agertu zituen Juanjok: Desberdintasun sozio-ekonomikoaren gatazka; aniztasun kulturalaren eta migrazioaren gatazka; gizartearen sekularizazioa; nortasun kulturalaren, hizkuntza nortasunaren eta nortasun nazionalaren gatazka eta Elizaren gatazka.
Frantzisko aita santua planteatzen ari den Elizaren ezaugarri batzuk aipatu zituen:Pobreentzako Eliza pobrea, errukitsua, gertukoa eta hurbila, bide berrietara irekia, errealitatean haragiztatua,elkarrizketa eta dizernimendua landuz mugetan bizi izateko.
Elizak plataforma ugari du hau gauzatzeko. Horretarako, beharrezkoa izango da: Gure kontenplazioa zaintzea (Nazareteko Jesusen kontenplazioa), Gure dizernimendua aktibo mantentzea eta eskerronez eta itxaropenez sufritzen dutenengandik gertu egotea
On Juan Mari Uriarte, Donostiako gotzain emerituak, hitzaldi bikaina eskaini zuen martxoaren 20an, “Gizartearen adiskidetzerako heziketa” gaiari buruz 100 pertsona ingururen aurrean. Bakerako heziketan gurasoen, parrokietako katekisten eta eskolaren eginkizuna goraipatu zuen. “Adiskidetzeak” eskatzen duen pentsamendu eta jarrera etiko sakona azaldu ondoren, adiskidetzerako heziketaren oinarrizko zutabeakaipatu zituen.
Haur, ume eta gaztetxoen adiskidetzerako heziketari buruzko irizpideak eta gazte eta helduok bakegintzan egin dezakegun biderako urrats batzuk azaldu zituen.Bakerako bidea makal doala dirudien arren, guztiz beharrezkoa da hausnarketa eta elkarrizketa sakon eta ugari egitea adiskidetzeaz,legamiak orean lan egiten duen bezala. Erronka handia izango du gizarteak biktima guztien zauriak sendatzen laguntzen eta baita espetxean dauden pertsonen duintasuna eta oinarrizko eskubideak errespetatzen. Elizak ekarpen egokia eskain dezake elkarbizitza landuz, formazioa eskainiz, zubiak eraikiz.
Hitzaldiaren amaieran, On Juan Marik idatzitako “La reconciliación” liburua aurkeztu eta hartzeko aukera izan zen. Mila esker, On Juan Mari!!
Bertso saio bikain batean, Andoni Egaña, Amets Arzalluz, Jokin Uranga eta Maialen Lujanbio aritu ziren aretoa bete zuten 200 pertsona baino gehiagoren aurrean.
Hitzak eta argazkiak: Juan Inazio Sudupe
Utzi erantzuna