Haur Hezkuntza

Haur Hezkuntza (0-6)

Haurraren garapenean lehen urteak oso garrantzitsuak dira, pertsonaren garapenerako eta zoriontasunerako oinarriak adin tarte honetan finkatzen direlako. Hori dela eta Floreaga ikastetxean, Konfidantzaren Pedagogian oinarritzen gara kalitatezko heziketa eskaintzeko.

Konfiantzaren pedagogiak garatzeko eta ZORIONTSU izateko behar duen guztiaz hornitutako gizaki moduan ikusten du pertsona. Hezitzailearen eta inguruaren eginkizuna konfiantza ematea da, bere buruaz fio dadin eta ondorioz, modu ezin hobean garatzeko aukera izan dezan.

Haurrak era autonomoan garatzeko gaitasuna du. Sen edo gaitasun hauek ez dira ikasten, izatez ditugu. Haurraren gaitasun hauetan sinestuz, hauek abiapuntutzat hartuz eta konfidantzazko eta begirunezko inguruneak eskainiz, haur bakoitzaren garapena osoa izatea bultzatzen dugu, beti ere, umearen erritmo biologiko, kognitibo eta emozionala kontuan izanik.

Adin ezberdinetako haurren arteko hartu-emana bultzatzen dugu, ikasleen arteko elkarrekintza eta ikaskuntza, aberasgarria ezezik, eraginkorra ere badelako beraien garapenean. Ikasle zaharrenei txikiagoak zaintzeko, eredu izateko, laguntzeko eta gauzak egiten irakasteko gogoa pizten zaie. Txikienei berriz, beraien ikas prozesurako gurea bezain lagungarria den laguntza ematen diete hartu-eman hauek.

Espazioak eta espazioaren antolaketak berebiziko garrantzia du, nola ikasleen ikasprozesuan hala bertan elkartzen direnen arteko harremanen eta ongizatean. Horregatik, Floreaga ikastetxean, haurraren garapenari egokitutako espazio irekiak ditugu.

Familia eta ikastetxearen arteko harremana estua izateari garrantzi handia ematen diogu, gure ikasleak eta heuren familiak konfidantza-giroan senti daitezen.

Haur hezkuntzako lehen zikloan (0-3) ordutegi malgua eskaintzen dugu, haurraren zein familien beharrak eta erritmoak errespetatu ahal izateko. Goizeko 7:30etatik arratsaldeko 17:00etara dago irekita.

Etapa honetan espazio guztiak haurrak etxean bezala sentitzeko antolatuta daude. Gune desberdinak (jangela, altuera desberdineko jolasteko guneak, atseden gunea, biltzeko guneak…) irekia den espazio amankomunean aurkitzen dira.