Floreaga Ikastetxeak bere 75. urtemuga ospatu zuen 2004-05. ikasturtean zehar. Floreaga Ikastetxeak 75 urte daramatza Azkoitiko herriaren zerbitzura, tradizio luze eta ederra gordetzen du belaunaldien oroitzapenean.
Azkoitiko Udalak sortu zuen Floreaga Ikastetxea 1929ko irailean, herriko heziketa beharrei aurre egiteko asmoan. Hasieran La Salletar erlijiosoek zuzendu zuten eskola berria. Gero, 1934an herriko maisu batzuk aritu ziren irakasten eta 1935ean Manjonianoak. 1936an, gerra hasi zen.
1938an Azkoitiko Udalak Salestarrei eskatu zien Floreaga ikastetxea berriro irekitzeko. 1947ra arte egon ziren Azkoitian eta lan handia egin zuten: eskolan, aisialdiko ekintzetan, antzerkian, katekesian,… Azkoititik joan beharra izan zuten, gerraren ondorioz erlijiosoen eskasia zela eta. 1949an Merzedarioak etorri ziren Floreagara.
1982an Azkoitian Elizaren bi eskola zeuden, Floreaga eta Miserikordia. Herriak neska eta mutilentzat Elizaren eskola bakarra nahi zuen. 1983an sortu zen Floreaga berria, neska eta mutilentzat, Salestarren zuzendaritzapean, Karidadeko Alaben laguntzaz.
1984ko martxoaren 18an Ikastetxeko eraikin berria inauguratu zen.
Gaur, “San José de Floreaga” Salestar Ikastetxea, Azkoitiko herriaren eskola da; herria da ikastetxearen jabea.
Ikastetxearen titulartasuna Salestarrei dagokie, Azkoitiko udalaren eta Donostiako gotzaindegiaren eskaria onartuz.
