Maiatzaren 13an, asteazkenean, ilusioz abiatu ginen Madrilerako ikasbidaiara! Goizeko 7etan Floreagatik irten, bidean gosaldu eta 12:30 aldera “Palacio Real de La Granja”n ginen bisita gidatua egiteko prest. Bisitaren ondoren, bertan bazkaldu, eta bazkalostean Segoviara abiatu ginen. Segovian, alde zaharrean paseatu, akueduktu ikusgarria ikusi eta hiriaren edertasunaz gozatu genuen. Eguna amaitzeko, Madrilgo hotelera iritsi eta elkarrekin afaldu genuen.
Bigarren egunean gosari eder batekin hasi genuen eguna, eta ondoren Torrejón de Ardozera abiatu ginen Europa parkea bisitatzera. Europako monumentu ezagunenen erreplikak ikusteak benetan harritu gintuen! Eguerdian, El Retiro parkean txalupetan ibili eta bertan bazkaldu genuen; lasai-lasai atseden hartu eta ingurune zoragarriaz gozatzeko aukera izan genuen. Arratsaldean Madril erdigunea bisitatu genuen: Puerta de Alcalá, Cibeles, Puerta del Sol, Plaza Mayor, Palacio Real eta Gran Vía. Gainera, San Isidro jaietan hiriko giro aparta bertatik bertara bizitzeko aukera izan genuen. Egunari amaiera emateko, Xanadú merkatal-gunera joan ginen afaltzera eta denbora libreaz gozatzera.
Azken egunean Warner parke ospetsuan pasa genuen eguna. Eguerditik arratsaldeko 19:00etara atrakzio batetik bestera ibili ginen: adrenalina, barreak eta emozioak ez ziren falta izan! Handik irtendakoan, nekatuta baina pozik, etxerako bidea hartu genuen. Bidean afaldu ondoren, goizeko ordu biak aldera Azkoitira iritsi ginen, hiru egun ahaztezin hauen oroitzapen ederrekin.
Utzi erantzuna