Maiatzaren 25ean Familien Festa zoragarria ospatu genuen Floreaga Ikastetxean. Patio berdean mahaiak eta aulkiak prest zeuden bezperatik. Goizean goiz hasi ziren Gurasoen Batzordeko kideak sukalde lanetan. Bazkaritarako paella zoragarria eman ziguten han bildu ginen 210 inguru lagunentzat.
Goiko patioan eta frontoian puzgarriak izan genituen, Sanz taldearekin. Puzgarri batzuk frontoian eta beste batzuk kanpoan, eguraldi bikaina baliatuz.
“Jaso burue” taldearen eskutik, ahalegin handia egin genuen sakelako telefonoak ahalik eta gutxien erabiltzeko. Alaibatzak barruko jolasak, bingoa eta musika girotzea eskaini zituen.
Gymkana animatua eta lehiatua izan genuen jarraian: umez eta gurasoez osaturiko lau talde aritu ziren hainbat jolas osatzen. Taldeak kamiseten koloreagatik ezberdintzen ziren: zuriak, gorriak, berdeak eta beltzak. Berdinketa salestarra jazo omen zen. Sokatiran Guraso Elkarteko Batzordekoak izan ziren txapeldun.
Bazkaria giro ezin hobean joan zen. Paella oso gustagarria zegoen, eta denentzat lain. Kafearen ondoren, Bingo saio pare bat jokatu eta berriro puzgarrietan ibiltzeko aukera izan genuen. Alaibatzak futbito partida ederra antolatu zuen. Tartean guraso talde bat dena jasotzen eta txukuntzen aritu zen.
Eta “Apar-festa” ederraz eman genion amaiera Familien festari. Lagun arteko giro ezin hobean ospatu genuen eguna. Eskerrik beroenak Guraso Batzordeari, Alaibatzari, Sanz taldeari,… eta parte hartu zenuten guztioi!!! Zorionak guztioi!!
Utzi erantzuna