2024ko On Bosco Astearen hasieran, Bulego musika talde ospetsuko Tomas Lizarazu (ahotsa, gitarra) eta Xabier Arrieta (bateria) Floreaga ikastetxeko On Bosco aretoan izan dira urtarrilaren 18an.
Iosu Irizarrek gidatu duen saioan, Tomas eta Xabik gogoratu dute areto honetantxe hasi zirela elkarrekin oholtza gainean.
Musikarekin lehengo kontaktuak gogoratu dituzte, Floreagan eta Alai Batzan,.. Bulego taldean aritu baino lehenago Passepartout taldean ibili ziren.
Bulego taldea 2019an sortu zen, lehen diskoa egin zuten, eta kolpetik Covid18 pandemia etorri zen. Pandemia garaian egoera gogor hartan gauza berriak egiten asmatu zuten, sare sozialak egoki erabiltzen, kartelak zabaltzen, QR kodeetan kantuak eskaintzen, bideoklipak grabatzen… euren filosofia indartu zen: ahal dena egin, gauza berriak egin,… Kontzertu baterako deia egin zuten, emanaldiak egiteko aukera sortzen zen une bererako.
Ondoren ibilbide musikal azkarra eta oparoa egin dute. Hiru urtean talde askok 10 urterekin egiten duten bidea osatu dute: 30 kantu baino gehiago, hainbat disko, zuzeneko emanaldi eta birak…
Euskal Herriko eta Espainiako hainbat tokitan eskaini dituzte emanaldiak. Atzerrian Finlandian eta Japonian ibili dira, adibidez. 2023ko Durangoko azokan bost egunez disko sinatzen egon ziren: neke eta poz asko sentitu zuten.
Euskaraz kantatzeari eutsi diote beti, euskara delako taldekoen hizkuntza naturala; baina hori ez da oztopo izan euren musika jende askori helarazteko. Gainera euskararen komunitatea handia ikusi dute, eta ateak zabaltzen zaizkiela.
Musikaz gozatzea dute amets eta helburu, zuzeneko emanaldietan gozatzen jarraitzea… Musikan profesionalizatzea ere aurrera doan prozesua da. Bira handia dute aurrean, azken abenduan sortutako disko berria aurkeztuz.
Japonian grabatutako pare bat bideo labur ikusi ondoren, entzuleen galderen txanda izan da. Euren kantu gogokoena zein den galderari erantzunez, biek “Zure begi horiek” aitortu dute.
Jada saioaren amaiera aldera, Tomasek gitarra hutsez, akustikoan zuzenean, “Ezer ez da berdina” kantatu du, ahots askoren koroarekin batera. Amaieran, gazte batzuk Tomas eta Xabirekin argazki batzuk ateratzeko aukera aprobetxatu dute.
Mila esker, Tomas, Xabi, Iosu eta emanaldian parte hartzeko zortea izan
duzuen guztioi.
Utzi erantzuna