Euskararen Nazioarteko Eguna atzo, abenduak 3, izan bazen ere, guk ez genuen ikastetxean ospatu gabe utzi nahi. Hori dela eta, gaur, astelehena, giro bikainean igaro dugu eguna!
Goiza trikitilari, txistulari, dantzari eta bertsolariekin hasi dugu. Ondoren, talde bakoitzak, bere gelan, MITOLOGIAri buruzko lanketa berezi bat egin du. Eta ikastetxeko ikasle guztion artean kartel erraldoi bat ere osatu dugu honako lelo honekin: “EINGO AL DIÑAU? EINGO AL DIAU? EUSKARAZ BARRA-BARRA”. Izan ere, nor izango ginateke gu geure hizkuntzarik gabe?
Lehiaketek ere izan dute beraien txokoa, ordea. LH eta DBHkoek ginkana bat egin behar izan dute. Euskal Herriari eta euskal kulturari buruzko hainbat galdera erantzun behar izan dituzte eta zein baino zein hobeto aritu dira! Bestalde, DBHkoek, arratsalde amaieran, finala izan dute On Bosco aretoan. A zer giroa sortu den bertan! Hor aritu dira lehian Sugaar, Mari, Olentzero, Gentilak, Tartalo, Sorginak, Lamiak eta Basajaun. Bai, bai guzti horiek.
Geure ikastetxean ospatzeaz gain, beste ikastetxekoekin ere elkartu gara plazan. Ibilbide desberdinak eginez, trikitilarien doinuan, Plaza Nagusira iritsi gara eta bertan, elkarrekin lau euskal kanta abestu ditugu, euskaraz bizi nahi dugula aldarrikatzeko.
Guk ere, eguna aldarrikapen berdinarekin amaitu dugu txikienen atarian. HE eta HHkoak ere lan eta lan aritu dira goizean eta arratsaldean, berriz, asmakizunekin, abestiekin eta dantzekin gozatzeko aukera izan dute. Baina esan bezala, bukaerako ekitaldian mezua plazako berdina izan da: Euskaraz barra-barra egin nahi dugu eta egingo dugu!
FLOREAGA EUSKARAZ, EUSKARAREKIN eta EUSKARAREN ALDE!
Utzi erantzuna