Oraingoan Erleen Nazioarteko Eguna ospatzea tokatzen zaigu! Maiatzak 20a da beraien eguna. Eta nolatan dute intsektu txiki batzuek beraien egun berezia? Erantzuna oso sinplea da: horien lanari esker ugaltzen direlako landareak, baita elikagaiak ematen dizkigutenak ere, eta azkeneko urteetan hainbat arrazoirengatik (poluzioa, pestizidak, aldaketa klimatikoa…) desagertzen ari dira. Beraz, gure onerako zaindu beharra ditugu animaliatxo hauek! Nola? Hona hemen ideia batzuk:
- Babestu ingurune naturalak.
- Sortu herri eta hirietan belardi gehiago.
- Zaindu landare autoktonoak eta basaloreak.
- Ipini balkoietan lore desberdinak dituzten landareak.
- Ez erabili pestizidarik.
- Gutxitu berotegi-efektuko gasen isuria.
- Ez ekarri beste herrialdeetatik animaliarik, inbaditzailea izan liteke gure lurraldean eta kalte handia eragin. Adibidez, liztor asiatikoa (Vespa vetulina). Hark erleak hil eta jaten ditu.
Jar ditzagun batzuk bada ere praktikan! Eta udaberria izanik, zergatik ez larre batera joan, bertan lasai eseri eta nolako erleak azaltzen diren behatu? Izan ere, ezti-erleez gain beste erle espezie asko bizi dira gurekin eta denak desberdinak dira! Tamaina, forma, kolore eta zaletasun desberdinak dituzte, batzuk lore horietara joaten dira, beste batzuk moreetara…ea zein ikusten dituzun! ZAINDU DITZAGUN ERLEAK!
Utzi erantzuna