Ohiturari jarraituz, Durangoko Azokan izan gara aurtengo ikasleen egunean ere.
Lehendabizi, Gernika bisitatzeko aukera izan dugu. Gernikako Batzarretxean izan gara eta bideo bat ikusi ondoren, bertako gidari batek Batzarretxearen historiaz eta gaur egungo funtzionamenduaz zenbait azalpen eman dizkigu. Arbola Zaharra ere ikusi dugu, noski, eta bere ondorengoa den gaur egungo Gernikako Arbola ere bai. Honek aurtengo Euskararen Egunean, gure patio berdean, guztion artean, osatu dugun zuhaitza gogorarazi digu; Floreaga sustraietan daraman zuhaitza. Abenduaren 3an, bertan bildu ginen ikasle eta irakasle guztiok, Gernikako arbolaren inguruan egin ohi diren batzarrak bezala. Gure zuhaitza oraindik hor dugu, patio berdean, ikasleek euskarari buruz sentitzen dutena adieraziz.
Gaurko egunera itzuliz, eguerdian, Durangora iritsi eta zuzenean Azokara joan gara. Bertan, ikasleek ginkana bat zuten burutzeko: idazle eta musikariekin argazkiak atera, zein izan den beraien azken liburu eta diska jakin, stand-ei eta Azokako guneei buruz hainbat galdera erantzun… Durangoko herrian ere bueltatxo bat eman dugu: Uribarriako Andra Mariaren basilikaren arkupetik pasa ondoren, Durangoko Azoka lehenengoz burutu zen lekua, kaleetan zehar ibili gara.
Etxera itzuli aurretik, berriro Azokara bueltatu eta pare bat talderen kontzertuak entzun ahal izan ditugu: Mocker’s eta La Basu.
Ederki ibili gara, geure historia eta kulturaz pixka bat gehiago ikasiz. Eta Gernikan ikusi dugun bideoak esaten zuen bezala: IZAN ZIRELAKO GARA ETA GARELAKO IZANGO DIRA.
FLOREAGA EUSKARAZ, EUSKARAREKIN eta EUSKARAREN ALDE!
Utzi erantzuna