SERGIO GÓMEZ

Martxoaren 1ean Sergio Gómez Azpeititik Erromara (Vatikanora) abiatuko da bizikletaz, 22 egun eta ia 2000 kilometroko bidean. Bere ondoan izango ditu Pedro, laguntzarako kotxeko gidaria, eta Omar, bere fisioterapeuta. Urtarrilaren 26an, ostiralean, Floreagan izan da LH3-6ko neska eta mutilekin, Don Boscoren Astearen barruan, bere proiektuak azaltzen.

Sergiok urteak daramatza gaixotasun arraroak dituzten umeei laguntzen. Santos, bere semea, honelako gaixotasun batek jo zuen, eta semeari laguntzeko plastikozko tapoiak biltzen hasi zen, tapoiak birziklatzeko saldu eta gaixotasun arraro hauen ikerketarako dirua bideratzeko. Orain urte batzuk Floreagan izan genuen Santos bera, Don Bosco aretoan. Familian ume eta gazte askori laguntzeko ideia sortu zen eta “Solidaridad y Esperanza. Asociación de ayuda a enfermedades raras” taldea sortu zuten.

“Solidaridad y Esperanza” taldeak laguntza ematen die Bio-Donostia eta Bio-Crucesi, gaixotasun arraroak ikertzen aurrera egin dezaten, bereziki Duchenneren distrofia. Halaxe adierazi dute  Ainara Vallejos eta Virginia Aretxabala medikuek. Inguruko erakunde eta udal askorekin harremanetan daude, tartean Floreaga Ikastetxearekin. Sergiok asko eskertu du Floreagan jaso duen babesa.

Hitzaldia oso interesgarria izan da. Aurrean geneukan Sergioren bizikleta. Pedro eta Omar ere etorri dira eta hitz batzuk esan dizkigute. Ikasle eta irakasle batzuk igoarazi ditu Sergiok oholtzara, eurei galderak egiteko. Azkenean bideo eder bat proiektatu du, bere proiektuen azalpena.  Saioaren amaieran Sergio eta bere kideekin argazkiak egiteko aukera izan dugu.

Mila esker eta zorte on, Sergio!!!