PAULA KASARES

CÓMO PUEDO AYUDAR A MI HIJO/A SI YO NO SÉ EUSKERA

Otsailaren 2an Paula Kasaresek ikastetxean eman zuen hitzaldia entzuteko zortea izan genuen. Euskal Filologian zein Gizarte eta Kultura Antropologian lizentziatua den Paula Kasaresek bere ibilbide profesionala soziolinguistikaren alorrean jorratu du. Gaur egun Nafarroako Gobernuaren menpeko Euskarabidea erakundean dihardu, Euskararen Sustapenaren eta Plangintzaren Zerbitzuko zuzendari. Horretaz gain, NUPeko Filologia eta Hizkuntzaren Didaktika Saileko irakasle elkartua da.

Cómo puedo ayudar a mi hijo/a si yo no sé euskera izeneko hitzaldi honen bidez gure seme-alabei laguntzeko jarraibide batzuk eman zizkigun. Igorri zigun lehenengo mezua hau izan zen: guztiok lagun diezaiokegu gure seme- alabari hizkuntza bat ikasteko prozesuan (modu positibo eta aktiboan), baita geuk hizkuntza hori ez badakigu ere. Giltza-hitza MOTIBAZIOA da. Baina nola motibatu ditzakegu?

Seme-alabek ekartzen dizkiguten berrikuntza linguistikoen aurrean JARRERA IREKIA agertuz: eskolan egin dutenaz galdetu, zein abesti abestu duten, zein ipuin kontatu dieten…
BERAIEN IKASLE BIHURTUZ. Umeei ikaragarri gustatzen zaie gurasoei irakastea. Galdetu nola esaten diren gauzak euskaraz.
ETXEAN EUSKARAREKIN BIZIZ. Etxean ere euskara entzuten dutela ziurtatu, telebista, irrati, ipuinen… bidez.
EUSKARA DENBORA LIBREAN TXERTATUZ. Eskolaz kanpoko ekintzetan parte hartu. Euskarazko antzerki, filmeak… ikustera eraman.
EGUNEROKOTASUNEAN EUSKARA erabiliz: egun on, eskerrik asko…

Garbi utzi nahi izan zigun hizkuntza bat gehiago jakitea bizitzaren aurrean BALIABIDE bat gehiago edukitzea dela. ZORIONTASUNean laguntzen duela, norberarenganako konfiantzan eta besteekin ditugun harremanetan. Hizkuntza bat gehiago jakitea ez dela kenketa bat, BATUKETA bat baizik.

Guztiz saio interesgarria eskaini zigun. Ordu eta erdi oharkabean pasa zitzaizkigun eta jarraitzeko gogoa genuen arren, amaitu eta etxera joateko garaia zen Paulak emandako gomendioak praktikan jartzera. Eskerrik asko, Paula!

FLOREAGA EUSKARAZ, EUSKARAREKIN eta EUSKARAREN ALDE!