“Heldu zaizkigu Eguberriak, hauek bai egun zoragarriak!”
Abestian dioen gisan, “urte guztia egun hauen zain, helduak alai, haurrak ere bai”. Oraindik iazko turroia kendu ezinik gabiltzan honetan, gure artean dugu dagoeneko aurtengo Gabon garaia. Hori horrela, eta ohiturei zintzo jarraituz, gaurkoan ere gabon kanta alaiz jantzi ditugu Azkoitiko kaleak. Ahots bakar batean elkartua ikasle eta irakasleok goiz atsegina igaro dugu baserritar arropekin dotore atonduta. Eta, abestiekin jarraituz, “ALDAPAN GORA, PAUSORIK PAUSO, ALDAPAN BEHERA, AUZORIK AUZO”, horrela igaro dugu goiza. Gaurkoan gainera, kategoriazko gonbidatuak izan ditugu. Hain zuzen, Huntza taldeko Josune Arakistain gure artean izateko ohorea izan dugu, bere anaia Ander laguntzaile zuela.
Goizeko 9.30ean bueltan, eta Balda plaza topalekutzat hartuta, umoretsu hasi dugu ibilbidea. Urtero legez, lehen geldialdiak Zaharren Egoitzan eta Santa Klara komentuan gauzatu ditugu. Horrelako egun berezi batean belarriak gozatzeko kale buelta egiterik ez dutenekin tarte hori igarota, kaleetan zehar barreiatu gara Olentzero bizkar gainean zaindari genuela. Dena den, goiza aurrera zihoan heinean, izan dugu indarrak berreskuratzeko beta ere. Hamaiketako eder batekin sabelaldea gozatu eta zintzurra busti ostean, martxa berreskuratu dugu giro jatorrean, etxeratzeko garaia iritsi den artean.
Eskerrik asko Plaza Berriko elkartean hamaiketako goxua prestatu diguzuenoi: Arana, Maje, Mila, Mailo eta Jabier. Hurrengo
Utzi erantzuna