JOSE KRUZ GURRUTXAGA

Jose Kruz Gurrutxaga aktorea Floreagan

Jose Kruz Don Bosco aretora etorri da gaur, urtarrilaren 27an, Don Bosco Astean. Esan daiteke aktore gisa egiten ari den bidaia luzen baten erdian bere hasierako antzokira itzuli dela. Iñaki Etxeberriak aurkeztu du Jose Kruz, aktore, muskari, tekniko gisa …

Jose Kruz azkoitiarra da. Floreagako ikaslea, Logroñoko salestar ikastetxeko ikaslea eta Alai Batzako monitorea izan da. Beti taula gainean … Jendearen aurreko ekintzetan parte hartzea beti gustatu zaio. Andoainen ikusentzutekoen arloko ikasketa teknikoak egin zituen (Irudia eta soinua), baina kamera aurrean aritzea gehiago gustatzen zitzaion lan teknikoan baino, ETBko casting batzuetan parte hartu eta serie batzuetan hasi zen, “Flamingo berria”, “A zer parea!” … eta berehala “Goenkale” serie ospetsuan. Han Carlos Lasaren rola egin zuen, drogen menpean zegoen gazten baten rola … Bere formazioa interpretazio eskolatan osatu zuen.

Jose Kruzek antzerkia, telebista eta zinemaren ezaugarri nagusiak azaldu dizkigu. Antzerkian taula gainean edo aretoan ikusten duguna denbora errealean gertatzen da. Telebistan kamera askorekin graba daiteke, ia denbora errealean. Zinean toma bakoitza zehaztasun osoz lantzen da, errepikapen ugariz, kamera bakarrarekin eta denbora asko behar da, agian bi hilabete, ordu eta erdiko filme bat osatzeko … “Todos estamos invitados” filmearen minutu bat erakutsi dugu: bi eguneko lana … Jarraian bikoizketaren ezaugarriak azaldu dizkigu “Infiltrados – Joan zirenak” filmearen zati txiki bat ingelesez eta euskaraz.

Arlo bokazionalean, Jose Kruzek bi aholku eman dizkigu bereziki: Lehenengoa, hemen ditugun baliabideak ondo erabiltzea: Alai Batzako arte ekintzak, antzerki musikalak, kantaldi – jaialdia … hori gustatzen bazaigu, aukerak eskatu edota aprobetxatu, nork bere gustuak eta bere burua ezagutzeko … Bestalde, antzerkiaren edo artearen munduan lan egin nahi bada, ikasketa egokiak egitea aholkatu digu, horretarako herritik mugitu behar badugu ere…

Mila esker, Jose Kruz.