Maiatzaren 7an, asteartea, “hiri hondakinak Azkoitian” argazki lehiaketako irabazleen gelek txangoa burutu zuten.

Gure ikastetxeko LH 1Bkoek eta DBH 2Bko Leyre Camaronek parte hartu zuten lehiaketan eta beraiek egindako argazkiak sarituak izan ziren (berri honekin batera ikus daitezkeenak). Horri esker, beraien gelak egun osorako Aralar Parke Naturalera joan ziren.

Aralarko Parke Naturalak 10.956 hektareako azalera biltzen du bere baitan, Gipuzkoako Abaltzisketa, Amezketa, Ataun, Lazkao, Tolosa eta Zaldibiako udal mugarteei eta Enirio-Aralar mankomunitateko lurraldeari dagozkienak. Naturagune babestua da eta paisaien edertasunagatik eta flora zein faunaren berezitasun eta aniztasunagatik nabarmentzen da.

Haraino autobusez abiatu ziren eta hamaiketakoa hartu ondoren, Lizarrustiko Parketxeko gidarien laguntzaz ibilaldia egin zuten Lareoko urtegiraino. Bidean gidariek inguruko landare eta animaliei buruzko informazioa eman zieten.

DBHko ikasleek aukera izan zuten kobazulo batera sartzeko. Aldapa igo, kaskoak ipini eta haitzuloko estalagmitak eta estalaktitak ikusteaz gozatu zuten. Horrez gain, gidariak proposatutakoa gauzatu zen, hau da, ilunpetan minutu luze batez isilean egotea.

Eguraldiak lagundu zuen jarritako helburuak bete zitezen: elkarbizitza sustatu, Aralarri buruzko informazioa ikasi eta naturaz gozatu.

Argazkiak: Alberto Ayerbe eta Iñaki Echeverría