Martxoaren 28an goizeko 5:00etan abiatu ginen Bartzelonara. Logura handiarekin jaiki ginen, baina orduak joan ahala animoak alaitzen joan ziren.
Eguerdiko 12:15etan iritsi ginen Montjuic-era, han egin genuen lehenengo geldialdia. Ondoren, Bartzelona hiriko zentroa ikustera jaitsi ginen eta han ibili ginen kaleetan zehar pasieran: Rambletan, kale gotikoan, udaletxeko plazan, Port Velen… Neka-neka eginda amaitu genuen eguna.
Martxoaren 29an, ostegunean, greba eguna zela eta aterpetxean geratu ginen kirola egiten: saskibaloia, futbola eta petanka. Eguraldi zoragarria egiten zuen eta bero handia. Arratsaldean, autobusa hartu eta gertu zegoen hondartza batera jaitsi ginen eta hantxe igaro genuen arratsaldea, batzuk bainatzen eta beste batzuk aerobic-a egiten. Gauean gau-bela izan genuen, neska-mutilak dantzan eta “el baile de la escoba”-n ere ibili ginen.
Ostiralean, hainbeste esperotako momentua iritsi zen, Port Aventurara joateko garaia. Uretako atrakzioetan ibiltzeko eguraldi paregabea egiten zuen eta han ibili ziren ikasleak blai-blai eginda. Handik bueltan, afaldu ondoren, gau-bela izan genuen berriro ere.
Eta iritsi zen azken eguna. Penetan jaiki ginen, baina oraindik bagenuen zer eginik Azkoitira itzuli aurretik. Maletak egin, gosaldu eta autobusa hartu genuen Camp Nou-rantz. Sarrerak hartu genituen eta futbol zelaia ikusi genuen, oso polita eta ikusgarria. Futbolariek entrenamendua zuten goiz horretan, baina kotxez iristen ikusteko aukera bakarrik izan genuen.
Handik atera ginenean, Sagrada Familia ikustera joan ginen, autobusetik jaitsi eta buelta bat eman genion aurretik eta atzetik ondo ikusteko. Eta orain bai, iritsi zen bidaiari amaiera emateko momentua.
Azkoitira gaueko 9:00etan iritsi ginen. Han zeuden gurasoak zain. Bidaia polita eta dibertigarria izan da, berriro egiteko modukoa.
Hitzak: Oihane Arregi
Argazkiak: Oihane Arregi eta Jesus Larrañaga
Utzi erantzuna