Martxoaren 28tik 30era DBH1eko ikasleak Gorlizen izan dira beraien ikasbidaia burutzen.
Martxoaren 28an, goizeko 09:00etan, autobusera igo eta Gorlizerantz abiatu ginen. Aterpetxeko arduradunak harrera ona egin zigun eta bideo baten bidez arauak jakinarazi zizkigun. Azpimarratu behar da gure ikasleak zoriondu egin zituela adi eta isilean egon zirelako. Behin maletak lagaz gero, Plentziara joan ginen. Herria ezagutu eta plazan bazkaldu genuen. Arratsaldean, sekulako eguraldia izan dugunez, hondartzan egoteko aprobetxatu genuen. Ausartenak bainatu egin ziren eta “Champions”-eko partidu bat jokatzeko aukera ere izan genuen. Egunari bukaera emateko jolasean ibili ginen aterpetxe aurreko zelaian.
Hurrengo egunean, bide malkartsu batetik farora joan ginen. Bista ederrez gozatu genuen, egindako argazkietan ikus daitekeen bezala. Eta arratsaldean programatutako bi ekintzei ekin genien: kanoak eta arku tiro. Berriro eguraldia lagun izan genuen eta guztiok pozik ibili ginen. Nahiz eta hasieran kostatu, gehienek arraunlari eta jaurtitzaile trebeak izatea lortu zuten. Eta afaldu ondoren, gau-jai ederra antolatu zen logela guztiek prestatutako antzerki eta dantzekin. Agertokitik bufoiak, baserritarrak, modeloak… pasatu ziren eta “txistako”-ren bat aditzeko parada ere izan genuen.
Eta ostiralean gehienek ez zuten aterpetxetik atera nahi, baina ez zegoen aukeratzerik. Hala ere, artean ekintza batzuk falta zitzaizkigun. Bihurgune asko zituen errepide batek Gaztelugatxeraino eraman gintuen eta kostata ermitara ailegatzeko dauden 231 eskailera igo genituen. Azkenik, Mundakara joan eta herriko kaleak, itsasoa eta Izaro uhartea ikusten ibili ginen.
Hiru egun bikainak izan dira gure artean elkar bizitzeko. Eta egia da guztiok oso ondo pasatu dugula!
Hitzak: Iñaki Echeverria
Argazkiak: Iban Garcia, Itziar Gainzarain, David Villahoz
[youtube width=”640″ height=”360″]http://www.youtube.com/watch?v=FQk8ZLqzwyA&feature=plcp&context=C485f9e2VDvjVQa1PpcFNQtPumJhmnK7rx84OfE9WvKNZw7RL1fdg%3D[/youtube]
Utzi erantzuna