Udaberria euritsua izan zela ordura arte kontuan izanik, joan aurreko egunak zerura begira eta eguraldiaren aurreikuspenak ikusten egon ondoren, heldu zen ekainaren 5a, Oriora joateko eguna, kurtso amaierako txangoa egitera.
Ekainaren 5ean, goizeko 09:00etan, ikasleak eta irakasleak Patio Berdean elkartu ginen, eta gure bizkar-zorroak hartuta, autobusa hartzera pozik abiatu ginen, aurreikusita bezala, eguraldi zoragarria atera zelako.
Autobusera igotzean hasi zen bi eguneko gure abentura. Denok oso alai joan ginen, eta berehala heldu ginen Orioko “Txurruka aterpetxera”. Aterpetxean, bakoitzak bere gauzak logelan kokatu ondoren, kanpora atera ginen tokia ikusteko asmoarekin.
Orion pasa genituen bi egunetan, eguraldia zoragarria egin zigunez, gure neska-mutilek gehienbat igerilekuan gozatu zuten, futbola eta beste hainbat jolas egiteaz gain.
Gure neska-mutilek ere bazituzten beraiek antolatutako ekintzak, ostegun gauerako hain zuzen ere. Zeruen zeuden ilargia eta izarren laguntzarekin, izugarri gozatu genuen ekitaldian gauerdira arte.
Familiaren babesetik kanpo egon diren bi egun hauetan, gure neska-mutilek, beraien arteko harremanak hobetzeaz gain, bizikidetza ere landu zuten. Jangelako eta logelako ardurak oso pozik bete zituzten, elkarri lagunduz.
Ostiralean, aterpetxea txukun-txukun utzi, jolastu eta bazkaldu ondoren, etxerako bidaia hasi genuen arratsaldean. Bostak aldera, Floreagara heldu ginenean gure aurpegiek nekea nabaritzen zuten, bi egun zoragarri pasa genituen seinale.
Hitzak: Maje Odriozola
Argazkiak: Maje Odriozola, Alberto Ayerbe, Isabel Tolosa, Marivi Pinedo, Amparo Mogrovejo eta Ana Ruiz de Azua.
Utzi erantzuna