Aurten ere LHko 3. zikloko ikasleek, Bertsozale Elkartearen eskutik, “Gu ere bertsolari” proiektuan parte hartzeko aukera izan dute. Eta aurten ere gehienak oso gustura aritu direla esango nuke.
Gogotsu aritu ziren “bertsomovieda” Beasaingo Arrano Elkarteak antolatutako lehiaketan. Gustura jardun zuten Bertsometarako bertsoak egiten eta serio eta arretaz aritu dira Baztartxoko bertso emanaldia prestatzen.
Urtero bezala gela bakoitzak gai bat aukeratu zuen eta gai horri buruzko hainbat ideia atera zituzten. Ondoren binaka bertsoak osatu zituzten eta hilabete inguru aritu gara,Euskarako klasetan, tarteka entseguak egiten eta eskenatoki gainean edota ikusle gisa nola portatu behar dugun gogoratzen. Entseguez gain mozorroak prestatzea ere lan mardula izan da baina emaitza ikusita ondo inbertitutako denbora izan delakoan nago. Aipagarria iruditzen zait, emanaldiaren egunean, gure ikasleek izan zuten jarrera, eskenatoki gainean nahiz jende artean.
Aurten gainera, Euskararen Normalkuntza proiektuarekin batera eta ikastetxean martxan dugun Partaidetza proiektuaren baitan saio berezi bat eskaini genuen ikastetxean bertan; 3. eta 4. mailako ikasleek beste inork baino lehen izan zuten jaialdia ikusteko aukera.
Aurrean dituzuen argazkietan ikus dezakezuenez oso gai ezberdinen inguruan aritu ziren ikasleak: 5Akoek Historiaren errepasoa egin ziguten; 5Bkoek espazioan zehar eraman gintuzten; 6Akoak Jai Giroan murgildurik ibili ziren, batzuk gozatuz eta beste batzuk sufrituz; eta 6Bko 3 mendizalek mendian zehar aurkitutako pertsonaia eta gauzekin izandako elkarrizketen berri eman ziguten.
Esaldi batek laburbiltzen du esperientzia hau: “Geu ere bertsolari” Euskara gozamenetik lantzeko proiektua.
Hitzak: Mailu Irizar
Argazkiak: 1. albuma Juan Inazio Sudupe
Utzi erantzuna