Martxoaren 13an, Joseba Gonzalez Zugasti Donostiako Elizbarrutiko Bikario orokorrak hitzaldi interesgarria eskaini zuen On Bosco aretoan, Floreagako XXIV. Euskal Kultur Jardunaldien aurtengo amaierako saioan. Gaia: “Fedearen urtea: Jainkoaren bila”.
Hitzaldia hasi baino minutu batzuk lehenago jakin zen Aita Santu berria aukeratua izan zela. Hitzaldian zehar Vatikanoko irudiak proiektatu ziren eta Erromako Gotzain berriaren bedeinkapena zuzenean jarraitu genuen internetez. Hirurogei lagun inguru bildu ziren aretoan
Joseba azkoitiarra da. Apaiz ordenatua izan zen 1993ko ekainaren 27an eta Teologian lizentziaduna da (Deustuko Unibertsitatean) eta Eskritura Santuan doktorea (Erromako Bibliako Institutu Pontifizioa). Eskritura Santua irakasten du Gasteizeko Teologia Fakultatean eta Donostiako Zientzia Erlijiosoen Institutuan, eta Gipuzkoako elizbarrutiko hainbat parrokietan aritu da pastoral eginkizunetan.
Josebak Benedikto XVI.ak Fedearen Urtea deitzean idatzi zuen “Porta Fidei” gutuneko bi pasarte azpimarratu zituen. Alde batetik, norberaren eta munduaren izatearen zentzua bilatzea, ja fedearen “ataria” da, fedearen dohaina ezagutzen ez bada ere. Bestetik, fededunak sarri berekin du sufrimenduaren, bakardadearen eta Jainkoaren isiltasunaren proba.
Interesgarria izango litzateke bi bertsolariri (adibidez egun hauetan hemen izan diren Maialen eta Joni) bi egoera hauek proposatzea ofiziotan egiteko.
Ataria topagune izan daiteke, sinestunak eta bilatzaileak elkarrekin hitz egiteko. Atarian bi kontzeptu oinarrizko izan behar ditugu kontuan: norberaren kontzientzia eta denon Jainkoa.
Nork bere kontzientziaren eremuan hartu behar ditu erabakiak. Adibidez, Benedikto XVI. Aita Santuak, bere kontzientzia behin eta berriro Jaunaren aurrean aztertu ondoren, erabaki zuen ber zerbitzuari errenuntziatzea. Joan Paulo II.ak heriotzara arte jarraitu zuen, bere kontzientziari men eginez. Oso garrantzitsua da bakoitzaren eta besteen kontzientzia errespetatzea. Kontzientzian aurkitzen dira norbera eta guztion Jainkoa. Gizakiak bere bihotzaren barnean, ezkutuan, Jaungoikoaren legea du gordeta. Bere buruaren eta beste guztien duintasuna hortxe oinarritzen da. Bestalde, kontzientziaz bizi eta jokatzeko heziketa prozesu bat behar da, ez da erraza.
Denon Jainkoa, gure eta guztion Jainkoa da, ez nirea bakarrik. Komunitatean bizi gara eta Jesusek Jainko Aitari erakutsi diguna aldarrikatzen dugu: Jaungoiko errukitsua, beti maite eta onartzen gaituena.
Ataritik etxera eta etxetik atarira egin behar dugu. Elizak munduaz arduratu behar du, eta guztion arteko elkarrizketan parte hartu behar du. Bihotzean Jainkoaren Hitza gordez, testigantza sinesgarria eskaini behar dio gizarteari, “Jainkoaren eta biziaren irrikari zabaltzeko gai izango direnen testigantza” (Porta Fidei, 15).
Hitzaldiaren amaieran, galdera eta iruzkinetarako denbora ere izan zen, elkarrizketa giroan.
Saio honekin eman zaie amaiera aurtengo Kultur Jardunaldiei. Antolatzaileek eskerrak eman dizkiete laguntzaile izan diren guztiei: Hiru hizlariei lehenbizi, Floreaga ikastetxeari eta Guraso Elkarteko Batzordeari, Azkoitiko Udala eta Javier Artetxeri, komunikabide eta partaide – entzule izan diren guztiei. Mila esker!!
Hitzak eta argazkiak: Juan Inazio Sudupe
Utzi erantzuna