Familiarizazioa, elkarrekin egiten dugun bidea.

Eskolako lehenengo egunak emozioz betetako uneak izaten dira. Haur batzuengan beldurrak, ziurgabetasunak edo malko txikiak agertzen dira; beste batzuek, berriz, jakin-mina eta ilusioa erakusten dituzte. Haur bakoitzak bere erara bizi du prozesu hau, eta, horregatik, garrantzitsua da pixkanaka hastea, bakoitzaren erritmoa, beharrak eta, batez ere, emozioak errespetatuz.

Bide honetan, irakaslearen lana ezinbestekoa da. Gure gertutasunak, pazientziak eta entzuteko gaitasunak haurrei seguru eta maitatu sentitzen laguntzen diete. Haien ondoan egotea, ezagutzea, ulertzea eta konfiantza eskaintzea dira eskolan gustura eta seguru sentitzeko lehen urratsak.

Eta eskolarekin batera, familiak ere ezinbesteko eginkizuna du. Familiaren eta eskolaren arteko komunikazio hurbil eta etengabeak norabide berean aurrera egitea, kezkak partekatzea eta haur bakoitzari ahalik eta modurik onenean laguntzea ahalbidetzen digu. Familia eta eskola elkarlanean ari direnean, txikiek inguruan konfiantza duten eta hazten laguntzen dieten pertsonak dituztela sentitzen dute.

Eta horrela, ia konturatu gabe, lehenengo egunetako beldurrek konfiantzari, lasaitasunari eta pozari egiten diete lekua. Malkoak irribarre bihurtzen dira, agurretako besarkadak gero eta laburragoak egiten dira, eta goizero segurtasun gehiagorekin iristen dira.

Urrats txiki bakoitza aurrerapauso handia delako…

Animo, familiak eta txikiak! Elkarrekin, maitasunez, pazientziaz eta konfiantzaz, hasiera berri hau une ederrez betetako bide bihurtuko dugu.