Jose Luis eta Dominika gurasoek sortutako familia ugari batean jaio zen Esteban 1931ko abenduaren 25ean, eta hurrengo egunean bataiatu zuten, hain zuzen ere, bere izena hartu zuen San Esteban egunean. 8 anai-arreba hazi ziren bertan. Familiatik datoz Estebanen kristau sustrai sakonak.
Tarraconense Inspektoria zaharrean hasi da Estebanek Salestarren bizitzan egin duen ibilbide luzea. Lau urte egin zituen Seminario txikian (Huesca, Campello, eta bi urte San Vicen del Hortsen), eta 1947an Nobiziatua egin zuen. Lehenengo profesioa 1948ko abuztuaren 16an izan zen, eta Salestarren karisman hasi zen erabat Jaunari ematen.
Filosofia Gironan ikasi zuen; gero Huescan eta Mataron egon zen irakasle, eta Teologiako prestakuntza-etapa (1954-1958) Bartzelonan, Martí-Codolan-en egin zuen. 1958ko ekainaren 22an Tibidaboko basilikan apaiz ordenatu zuen Antonio Urbss gotzainak.
Gizarte Zientzien irakaskuntzarako prestakuntza jaso zuen, ikastetxeen zuzendaritza eta administraziorako ikastaroak egin zituen, UPS-Erromako eguneratze teologikoko ikastaroa egin zuen. Euskara irakasteko prestakuntza prestakuntza jaso zuen. Bere ama hizkuntza gogo biziz maite zuen. Salestarren giro euskaldunetan energia handiz zabaldu zuen Jesusen mezua, bere ama hizkuntzan.
1959az geroztik gure inguruko Salestar etxeetan egin zuen lana, Iruñea, Gurutzeta, Santander eta Zuazoko etxeetan kontseilari, bikario edo ekonomo karguak izan zituen. Donostiako Intxaurrondon urte askoan egin zuen pastoral lan bikaina. Deustun zuzendari izan zen 1976-79 hirurtekoan. Eta Azkoitiko Floreagara etorri zen 1999an. Hemen bizi izan ditu bere bizitzako azken 23 urteak, besteen zerbitzurako aparteko gaitasunarekin ia azken unera arte. Bere heriotza, 2023ko urtarrilaren 12an, lasaia izan da, komunitateko anaiez eta Azkoitiko bere familiaz inguratua.
Esteban salestar sendoa izan da, lanerako gaitasun handikoa, noblea eta zuzena, azkarra, adeitsua, eta eginkizun hezitzaile eta ebanjelizatzaileak eskatzen zion edozertarako prest zegoena. Apaiz-ministerioa fideltasunez garatu du, batez ere Salestar Familiako taldeekin. Bakezalea izan da egoera sozial nahasietan ere. Floreagan ondo gogoratzen dugu nola zaindu duen etxea eta etxekoak, nola prestatu eta bizi izan dituen mezak eta barkamenaren ospakizunak, bere Ama Birjinarenganako maitasuna… Ondo gogoratzen ditugu bere mendi ibilerak, naturaz gozatzen eta sentsibilitate hori besteengan sortzen, bere koadro ederrak, nola apaintzen zituen ikasgelak eta eliza, bereziki Eguberri eta Garizuman. Salestarren bizitzan eta misioan eskuzabala izan da. Esteban, atseden hartu bakean paradisuan.
Goian bego
Utzi erantzuna