Euskara badugu, bagara!

Aurten ere iritsi da abenduaren 3a, Euskararen Nazioarteko Eguna eta urtero egin ohi dugun moduan, giro bikainean igaro dugu eguna.

Goiza trikitilari, txistulari, dantzari eta bertsolariekin hasi dugu HH eta LHkook. Jarraian, HE eta HHkoak lan eta lan aritu dira goizean eta arratsaldean, berriz, asmakizunekin, abestiekin eta dantzekin gozatzeko aukera izan dute.

Bestalde, LH eta DBHko talde bakoitzak, bere gelan, EGUZKILOREei buruzko lanketa berezi bat egin du. Eta ikastetxeko ikasle guztion artean kartel erraldoi bat ere osatu dugu honako lelo honekin: “EUSKARA BADUGU, BAGARA!”. Izan ere, gure hizkuntzak, euskarak, behar gaitu eta eguzkiloreen gisa babestu egin behar dugu izpiritu eta egoera txarretatik.

Lehiaketek ere izan dute beraien txokoa, ordea. LH eta DBHkoek ginkana bat egin behar izan dute. Euskal Herriari eta euskal kulturari buruzko hainbat galdera erantzun behar izan dituzte eta zein baino zein hobeto aritu dira! Gainera, DBHkoek, goizaren amaieran, finala izan dute On Bosco aretoan. A zer giroa sortu den bertan! Hor aritu dira lehian Sugaar, Mari, Olentzero, Jentilak, Tartalo, Sorginak, Lamiak eta Basajaun. Bai, bai, guzti horiek.

Geure ikastetxean ospatzeaz gain, beste ikastetxekoekin ere elkartu gara plazan. LH1etik DBH2rakoak, trikitilarien doinuan, Plaza Nagusira iritsi gara eta bertan, elkarrekin lau euskal kanta abestu ditugu, euskaraz bizi nahi dugula aldarrikatzeko. Momentu berean, DBH3 eta DBH4koek bingo musikatuan parte hartu dute. Zelako barreak, dantzak eta sariak izan ditugun! Oso ondo pasa dugu.

Jarrai dezagun euskaraz hitz egiten, gurean ditugun hitz kuttunak babesten eta erabiltzen!