Dakizuen moduan neguan txoritxoentzako janlekuak diseinatu eta egin genituen. Eta ez hori bakarrik! Fruitu lehorrez, mahaspasez eta oloz egindako opilak prestatu genituen asteetan zehar txoritxoei janaria ipintzeko.
Orain berriz, udaberria iristear dela janlekuak kenduko ditugu txoritxoak nahiko janari aurkitzeko moduan direlako. Baina horrek ez du esan nahi gure ikasgeletatik txoritxoak ikusteko aukerarik ez dugunik orain ere! Udaberrian hegaztiak bizi-bizi ibiltzen dira ugaltzeko garaia dutelako. Hori dela-eta, txoritxo arrek luma dotoreak janzteaz gain abestu egiten dute emea erakartzeko.
Urtaro bikaina beraz, gure inguruko txoritxoak ezagutzeko! Eta horretanxe ibili gara DBH4ko Biologia-Geologiako ikasleok, ikastetxe inguruan ikusteko aukera gehien ditugun txori espezieak identifikatzen eta ezagutzen. Baina, ez gara ikasgelatik zuhaitzak gertu ikusteko (eta ondorioz, bertaratzen diren txoritxoak ikusteko) aukera dugun maila bakarra, LH 4. mailakoak ere zorte hori dutenez, beraiengana joan ginen ikasitakoaren berri ematera.
Horrela, kaskabeltz handiaren, kurloiaren, txonta arruntaren… azalpenak eman, bideoak erakutsi eta irudiak margotu genituen. Ekintza amaitzeko, Urdaibai Bird Centerreko zuzeneko webkamera batera konektatu ginen ea han ikusten ziren txoritxoak guztion artean identifikatzeko gai ginen ikusteko. Eta oroigarri moduan, gure inguruko zortzi txoritxo espezieren irudiak agertzen diren posterra oparitu genien!
Gozatu udaberriaz!
Utzi erantzuna