2. Euskaraldiko azken egunaren bezperan, Euskararen Eguna iritsi zaigu. Aurtengo hau desberdina izan da gelako burbuilak mantendu beharra izan baitugu. Hala eta guztiz ere, egun polita igaro dugu!
Azaroaren 20tik gaur arte hainbat ekintza burutu ditugu Euskaraldiaren inguruan. Txikienak muralak eta aho biziak margotzen aritu dira. Pirritx eta porrotxen “Ahobizi eta belarriprest” ere abesten eta dantzatzen aritu dira. LHkoek, tutoretza saio batean, dituzten hizkuntza ohiturez hausnartu dute. Ondoren, borobil batean norekin, noiz eta non saiatuko diren euskara gehiago erabiltzen idatzi dute. Borobil guztiak harian itsatsita ariguneen kontzeptua azaldu zaie. DBHkoek, berriz, pare bat “egun on” egin dituzte Euskaraldiari buruz. Zer den eta zer helburu dituen aipatzeaz gain, bideo batzuk ikusi dituzte. Bestalde, “Geure Euskaraldia” egitasmoa burutu dute eta 15 egunetan, txaparen ordez, eskumuturreko bat eramateko konpromisoa hartu dute.
Eta abenduaren 3a, Euskararen Eguna, iritsi da! Goizean goizetik musikaz girotu dugu eguna. A zer bizipoza! Baina gela barruan festa giroak jarraitu egin du. Izan ere, sartu orduko LH6ko neska mutilek grabatutako bertsoak ikusi eta entzuteko aukera izan baitugu.
DBHkoek tutoretza saioa bat izan dute, maila desberdinetan gai desberdinak landu dituztelarik. Batzuk Durangoko Azokaz aritu dira eta beste batzuk estres linguistikoaz, aurriritziez, hizkuntza ohiturez… Ondoren, bai LHkoek eta bai DBHkoek Euskal Herria eta euskal kulturari buruz ginkana bat egin dute. Bakoitzak bere ordenagailua izan du eta bukaeran gela bakoitzean irabazle bat egon da.
HHkoak herri kirolak burutu dituzte: lokotx bilketa, soka tira, harri jasotzea, txinga eramatea… Beraien alderdi artistikoa erakusteko aukera ere izan dute.
Euskararen Nazioarteko Eguna amaitu da eta Euskaraldia ere bihar amaituko da.
Gogoratu, ordea, EUSKARAK 365 EGUN dituela. Beraz, manten dezagun urte osoan zehar GEHIAGO, GEHIAGOREKIN eta GEHIAGOTAN leloa!
FLOREAGA EUSKARAZ, EUSKARAREKIN eta EUSKARAREN ALDE!
Utzi erantzuna