Iritsi da eguna! Floreagako ikasle gehienek astelehenean hasiko dute ikasturte berria.
Gehienak martxoaren 13az geroztik ez zarete Floreagan izan, baina iritsi da Floreagan berriz sartzeko eguna. Asko eta asko gela zapaltzeko, pasiloetan barrena ibiltzeko, patioan jolasteko irrikitan egongo zarete. Sei hilabete luze izan dira eta oraingo honetan denok animo desberdinarekin hasiko dugu ikasturtea. Denok hobeto eta gehiago baloratuko ditugu klaseak.
Floreagako lankide guztiok gogor aritu eta arituko gara egoera berri eta desberdin honetara ahalik eta ondoen molda gaitezen denok. Floreaga lehengoa da, baina egoera berriak eskatuta sarrera toki desberdinetik egingo du gela bakoitzak, saiatuko gara elkarrenganako tartea zaintzen, eskuak garbitzen… Kontu hauek guztiak eta beste batzuk esango dizkizue tutoreak lehenengo egunean.
Etxean egon ginen hilabete horietan irakasleok bideo bat grabatu genuenean esan genizuen “EONGO GEA”. Oraingo honetan aurrez aurre ikusiko dugu elkar eta ez pantaila baten atzean. Egia da orain, eta egoerak hala eskatuta, maskara baten atzean ikusiko dugula elkar, baina elkar zaindu behar dugu birus honi aurre egiteko.
Denon gogoan dago ikasturte lasaia izatea, baina batez ere osasuntsua izatea nahi dugu.
Utzi erantzuna