Urtarrilaren 25ean Floreagan izan genuen Alvaro Neil, “Biciclown”, eta bere hitzaldiak “Don Bosco Astea”ri hasiera eman zion DBHko ikasle eta irakasleentzat.
Alvarok bizikletaz munduari bira eman dio. 200.000 kilometrotik gora, 117 herrialdeetan zehar, Ameriketako hego muturretik iparraldeko ertzeraino, Europa herrialde guztiak, Afrika Atlantiko ozeanoaren kosta goitik beheraino, Asian Ekialde Hurbileko basamortuetatik Ekialde Urruneko herrialde ia guztietaraino, Australian zehar … 2004n hasi eta 2017ko azaroan Oviedon amaitu zuen arte … Orain 50 urte ditu.
Alvarok bere bizikleta eta bere kanpin denda txikia erakutsi zizkigun. Bideo eder baten, bere ibilbidea laburbildu zuen. Paisaia zoragarriak, munduko herrialde guztietako jendea … eta bizitzeko filosofia bat.
Alvarok Lege ikasketak egin zituen eta Notario lanean aritu zen urte batzuez. Oporretako hilabetearen zain bizi zen, bizikleta hartu eta munduko bazterrak ikusteko asmoz. Dena uztea erabaki zuen arte. Benetan nahi zuena mundua ikustea zen, bidaiatzea, bizikletaz … Eta, berak dionez, bizitzan benetan nahi duzuna egin behar duzu, gaurko eguna intentsitatez bizi … aukerak egin behar dira, nahi den guztia ezin delako lortu. Ez dadin gertatu bizitza igaro eta gero ez eginaz damutzea …
Alvarok bost hizkuntza hitz egiten ditu, baina garrantzitsuena askotan ez da hizkuntza jakitea, baizik eta benetan komunikatzeko asmoa izatea. Jende askok lagundu dio Alvarori, berak dionez, eta gutxien duenak ematen du laguntza handiena normalki. Diru gutxirekin bizitzen ohitu da, liburuak eta bideoak berak editatzen ditu.
Bere bidaietan zehar Clown edo pailazo emanaldiak eskaini izan ditu, beti dohain, baina proiektu zehatz batzuen alde, adibidez Benin eta Togo inguruko kaleko umeentzat eta haien aldeko saioak, Grezian bildu diren errefuxiatuentzat eta haien alde …
Saioaren amaieran aukera izan genuen munduko hainbat tokiei buruz galdetzeko: Txile, Venezuela, Maroko, Pakistan … Plazer handia izan da bere bideoa eta hitzak jasotzea. Eskerrik asko!!
Hitzak: Juan Inazio Sudupe
Argazkiak: Juan Inazio Sudupe
Utzi erantzuna