Amets bat bi gurpilen gainean
Arkaitz Astiazaranek bizikletan bidaia luzea egin zuen Euskal Herri osoan zehar, ia hiru hilabetez 2013ko udaberrian. Lasturkoa eta beti bizikleta zalea izanik, gure inguruko altxor ezkutuen bila atera zen etxetik eta bidaia luze eta ederra egin zuen, batzuetan bakarrik, beste batzuetan lagun batzuk ondoan … Gipuzkoako malda gogorretan abiatu Eibarretik, lurralde osoa igaro, gero Bizkaia, Araba, Nafarroa … Ondoren Zuberoa, Nafarroa Beherea eta Lapurdi … Bidaian zehar eginiko bideo grabaketekin, film ederra osatu du, “Euskal Herriko altxorren barrena”, irudi ikusgarri eta musika estilo ugari eta gozagarriekin bere iruzkinak nahastuz, han rock kanta, han Oskorri, hemen albokaren doinua, trikitixa, … Herriak, mendiak, ibaiak, paisaia zoragarriak! Gainera, Arkaitzek, istripuz hil zen bere lagun Josebari omenaldi bat eskaini dio.
Gaur, urtarrilaren 26an Floreaga ikastetxeko Don Bosco aretoan izan dugu bere esperientzia DBHko ikasleei azaltzen.
Erabakia hartu eta bizikletan abiatzea ez zen erraza izan. Aspaldiko amets bat zen. Baina ausardia behar da nork bere ametsei itxura emateko …
Orbea etxeak utzitako bizikletan, kasko babeslea buruan, hankak gero eta hobeto, txakal aldiei aurre eginez, aterpeetan lo eginez, jana eta edana gero eta hobeto zainduz … aurrera eraman zuen ibilbidea, zorte onaren laguntzaz ere bai, zulatu bat bera izan gabe. Euskararen hainbat doinu berezi entzun eta gozatuz … Batez ere gure herri eder honetan dugun hainbeste altxor ezkutu ezagutuz, hain gertu, hain ezezagun …
Hitzak: Juan Inazio Sudupe
Argazkiak: Juan Inazio Sudupe
Utzi erantzuna