LOGROÑON BILERA

Gazteak eta Garapena erakundearen urteroko bilera egin zen Logroñon 2010eko urriaren 24an, igandean. Azkoititik bederatzi lagun joan ginen (DBH3ko bost ikasle: Sara, Azul, Ainhoa, Mireia eta Julen, eta helduen taldeko lau kide: Jose Mari, Mertxe, Josu eta Juan Inazio) gure kide guztien izenean. Toki askotatik etorritako 60 lagun inguru bildu ginen, DOMUND igandeko bileran.

Ongietorria eta aurkezpen hitzen ondoren, bi taldetan banatu ginen, bakoitzak bere ekintzak osatzeko asmotan.

Gazteen taldean Urnieta, Deustu, Barakaldo eta Azkoitiko neska eta mutilak bildu ziren; guztiak solidaritate proiektuetan laguntzen aritzen diren gazteak, eta Maria Arrieta dinamizatzaileak koordinaturiko ekintzak osatu zituzten: hari batzuen bitartez solidaritatea lantzeko arrazoiak azaldu, eta munduaren egoera aztertu zuten, bere indar guneak, arriskuak, ahuleziak eta aukerak adieraziz.

Helduen taldean, uda partean Beninen egon ziren Joseba Gisasola eta Maria Victoriak beraien esperientzia komentatu zuten, argazki batzuen laguntzaz. Haiti aldetik etorri berri den Iñaki Vergara argazkilariak hango lekukotza eskaini zigun. Gero Isaak Díez, Gazteak eta Garapena fundazioko lehendakariak, azken urteko notizien berri eman zigun, gure erakundeak bideratu dituen azken proiektuak eta kontu ekonomikoak ere aztertu zituen.

Beningo umeen alde udazkenean egingo den Janari Bilketaren antolaketa adostu zen, eta horretarako kartelak aukeratu ziren.

Talde argazkiak egin ondoren, Meza santua ospatu genuen. Bertan jaso genuen misiolari handi baten heriotzaren berri, Alfredo Elejalde, azken urtean Azkoitian egon den salestarraren heriotza. Misiolari honek lan bikaina egin zuen Afrikan, batez ere Cabo Verden eta Mozanbiken.

Elkarrekin egin genuen bazkari gozoa, giro ezin hobean. Andere edo panpina solidarioak eta eskumuturrekoak erosteko, eta kamiseta batzuk jasotzeko aukera izan genuen. Elkarri eskerrak emanez, eta hurrengora arte agur esanez, amaituko genuen bilera eder hau.