Alfredo Elejalde misiolaria hil da
Igandean, urriaren 24an, Misioen igandean, hil zen Alfredo Elejalde misiolari salestarra Bilbon. 2009ko irailean Azkoitiko salestar komunitatera etorri zen, euskara ikasteko asmoan. Urte erdian zehar ikusi genuen meza ematen, ospakizunetan,… autobusean herritik Donostiara eta buelta, bere txapela eta guzti… 2010eko udaberrian minbizia agertu zitzaion eta orduan Barakaldoko komunitatera joan zen, familiaren gertu tratamendua jasotzera. Gaixotasunak azkar eraman du, eta garai honetan tenple handia erakutsi du, eta Jaungoikoarenganako fede bizia. Bere heriotzak hunkituta utzi gaitu.
Alfredok salestar bizitzako lehen ikasketa filosofikoak Urnietan egin zituen. Oso gazterik joan zen Afrikara. Lan bikaina egin zuen Cabo Verde irletan. Gazteizen ikasi zuen Teologia eta apaiz ordenatua izan zen. Berriro Afrikan, batez ere, eskola, parrokia eta umeentzako janaria banaketa izan zituen eginkizunik handienak. Cabo Verdeko nazionalitatea jaso zuen, eta bertakoekin bertako egin zen, hango hizkuntza kriolloak ikasiz. Ondoren Mozanbike aldean egon zen, hango koordinazio ekonomikoa eta ebanjelizazio lanean nabarmenduz…
Azken urte gutxi batzuk eman ditu gure inguruan, bere familiari arreta handiago emateko asmoan etorri baitzen, bere gurasoak bizi zirela artean. Gure probintzia erlijiosoan Barakaldon eta Intxaurrondon aritu zen lanean, Azkoitira etorri aurretik.
Barakaldon izan ziren hiletak aste honen hasieran. Portugaleko salestarrak ere etorri ziren, eta Cabo Verdeko jendearen maitasunezko mezu ugari irakurri ziren. Cabo Verdeko komunikabide guztiek, batez ere irratiek, oihartzun handia eman diote Alfredori, han oso maitatua baitzen.
Alfredo bizia Jesusen jarraipenean eta pobreenen alde lanean gastatu du. Eredu bikaina utzi digu. Goian bego.
Floreagako elizan, Alfredoren alde emango da meza azaroaren 1ean, Santu Guztien festan, eguerdiko 12etan. Denak gonbidatzen zaituztegu bere alde otoitz egitera.
Kaleko umeen aldeko zozketa
Beningo kaleko umeen aldeko zozketako azken bileteak gelditzen dira oraindik saltzeko. Kontuan hartu behar da azaroaren 2 eta 3 itsuen sariekin azalduko dela zenbaki irabazlea. Larunbata, igandea eta astelehenean zehar kalean egongo dira Gazteak eta Garapena taldekoak, azken bileteak saldu asmoan. Bilete batzuk erosiz lagundu nahi diguzuen guztioi, MILA ESKER!!
Hitzak eta argazkiak: Juan Inazio Sudupe
Utzi erantzuna