Maiatzaren 24a: egun honetan edozein salestar etxe, ikastetxe, patiotan ospatzen da Maria Laguntzailearen eguna; izan ere debozio handia zion On Boscok Maria Laguntzaileari.
Floreagan aurreko astean hasi ginen egun honi begirako ekintzak egiten: LH eta DBHko ikasleak txapelketan murgilduta aritu dira jolasorduetan, bakoitza bere taldearen alde, sariak ere ez baitira nolanahikoak. HHkoek asteazkenean, LH 6ko neska-mutilen laguntzarekin, izan zituzten jolasak. Arratsaldea goxo bukatzeko andereñoek banatutako bolloa eta txokolatea jan zuten.
Txapelketen bukaera Maria Laguntzailearen egunean izan da. Eguna meza ospatuz hasi dugu LH eta DBHkoekin. LHkoek elizan bertan erakutsi dituzte gelan prestatutako kartela. Bertan Maria Laguntzailearen ondoan gure ikasleen amak agertzen ziren. DBH4ko ikasleei, denbora asko baino lehen ikasle ohi izango direnei, gaur eman die ikastetxeko Zuzendari Titularra den Davidek ikasle ohiei ematen zaien ikurra. 11:30ean HHkoek elizkizun txiki bat izan dute.
Meza ondoren LHkoek pelikula eta DBHkoek astean zehar hasitako txapelketari bukaera eman diote. DBHkoentzat ohiko jolasez gain, aurtengoan “Pintxo txapelketa” antolatu da. Gela bakoitzak hiru pintxo desberdin prestatu behar zituen. Ez da erraza izan erabakitzea zeinentzat izango zen lehenengo saria. Etorkizunean gure ikasle batzuk “Master Txef”-en izango ote ditugu!
Arratsaldez LHkoek jolasak izan dituzte, horretarako maila guztietako ordezkariak zituzten taldeak antolatu dira. Proben artean fruta ederki jan dute!
Egun pozgarria gaurkoa!
Utzi erantzuna