Apirilaren 9tik 11ra DBH1eko ikasleak Gorlizen izan dira beraien ikasbidaia burutzen.
Apirilaren 9an, goizeko 09:00etan, autobusera igo eta Gorlizerantz abiatu ginen. Aterpetxeko arduradunak harrera ona egin zigun eta bideo baten bidez arauak jakinarazi zizkigun. Azpimarratu behar da gure ikasleak adi eta isilean egon zirela. Behin maletak lagaz gero (batzuenak oso, oso… handiak, “badaezpada ere” etxeko armairu osoa eraman zutelako), Plentziara joan ginen. Herria ezagutu eta plazan bazkaldu genuen. Une horretan hasi zen animaliekin izan dugun harreman estua: karramarroak harrapatzen aritu ziren batzuk, bestek ikusitako txakur guztiak zenbatzen… eta hurrengo egunetan zaldiak, behiak, igelak, oreinak, arrainak, txoriak… Ez dakigu hurrengo urtean Bartzelonako zooa ikusteak mereziko duen… Arratsaldean, eguraldi eguzkitsua egin zuenez, hondartzan egoteko aprobetxatu genuen. Ausartenak bainatu egin ziren eta “Champions”-eko partidu bat jokatzeko aukera ere izan genuen. Egunari bukaera emateko jolasean ibili ginen aterpetxe aurreko zelaian.
Hurrengo egunean, bide malkartsu batetik farora joan ginen. Bista ederrez gozatu genuen, egindako argazkietan ikus daitekeen bezala. Eta arratsaldean programatutako bi ekintzei ekin genien: kanoak eta arku tiro. Berriro eguraldia lagun izan genuen eta guztiok pozik ibili ginen. Nahiz eta hasieran kostatu, gehienek arraunlari eta jaurtitzaile trebeak izatea lortu zuten. Eta afaldu ondoren, gau-jai ederra antolatu zen logela guztiek prestatutako antzerki eta dantzekin. Agertokitik abeslariak, dantzariak, aktore, aktoresak, imitatzaileak… pasatu ziren eta oso ondo egin zutela esan beharra dago.
Eta ostiralean gehienek ez zuten aterpetxetik atera nahi, baina ez zegoen aukeratzerik. Hala ere, artean ekintza batzuk falta zitzaizkigun. Bihurgune asko zituen errepide batek Gaztelugatxeraino eraman gintuen eta ermitara heltzeko lehenengo eskailerak igotzeko prest geundenean, kartel batek adierazi zigun ezin zela igoera egin bidea konpontzen ari zirelako. Azkenik, Mundakara joan eta herriko kaleak, itsasoa eta Izaro uhartea ikusten ibili ginen.
Hiru egun bikainak izan dira gure artean elkar bizi izateko. Eta egia da guztiok oso ondo pasatu dugula!
Utzi erantzuna