Gozatuz eta ikasiz, horrelaxe igaro dugu Joxerra Garziarekin egindako ikastaroa.
Joxerra Garziak 2008an argitaratu zuen “Jendaurrean hizlari” liburua. Edozein komunikazio egoerari aurre egiteko prozedura jakin bat proposatzen du bertan eta prozedura hori da, hain zuzen ere, 4 saioetan zehar azaldu diguna.
Edozein komunikazio egoeraren aurrean, baita laburrenean ere (amonari bazkalondoan zorionak opatzea adibidez), asko dira kontuan hartu beharreko arloak: zer esango diot, zer ideia aipatuko ditut, zer ordenetan aipatuko ditut, zein da hori esateko modurik egokiena eta ez zuzenena bakarrik, zer tonotan hitz egin behar dut, nola erabili behar dut ahotsa edota komeni al zait keinurik egitea… Guzti horretaz aritu zen luze eta zabal, arlo bakoitzean eguneroko bizitzan gertatzen diren egoeretatik abiatuz eta oso adibide egokiak emanez.
Bi ziren ikastaroaren helburuak: alde batetik, geu,irakasleok, trebatzea eta bestetik geure ikasleekin lantzeko pista edo jarraibide batzuk lantzea.
Laburra eta trinkoa izanik ere oso ikastaro egokia iruditu zaigu, lantzen ari garen Curriculum berriaren ikuspegiarekin bat egiten duelako. Bestalde behin eta berriz entzuten dugu “Komunikazioaren Gizartea “ dela gurea eta komunikazio gaitasuna dela bereziki landu beharretako bat eta horretarako aparteko tresna dugu Joxerrak eskaintzen duena.
Hitzak: Mailu Irizar
Utzi erantzuna