Aurtengo udan Juan Inazio Sudupe salestar azkoitiarra, Kolonbian izan da, Medellin hirian, salestarren Ciudad Don Boscoko proikektuak ezagutu eta laguntzen, uztailaren 3tik abuztuaren 6ra arte. Euskadiko sei gazte boluntariorekin batera egon da. Esperientzia bikaina izan da, berak eta boluntarioek adierazi dutenez.
Bake prozesua aurrera doa Kolonbian. Gobernuak eta FARC gerrilak bakea sinatu zuten, eta ELN taldeak gobernuarekin tregua luzea adostu berri du. Hala ere gizartean injustizia batzuk ikusten dira, ustelkeria handia dago, drogen kontsumoak gora egin du, narkotrafiko txikia ere nabarmena da, eta auzoetan talde biolentoek ezartzen dituzte euren legeak eta muga ikustezinak. Dena dela, ilusioa da nagusi Medellinen eta garai bateko biolentzia eta bortizkeria gainditzen ahalegintzen ari dira.
Arriskuan dauden ume eta gazteekin egiten dute lana “Ciudad Don Boscon” Salestarrek. Gaztetxo hauek eskubide zapalketak jasan dituzte, bortxaketak, delituak, … Salestarrak gaztexoak onartu eta etorkizunerako bideak zabaltzen ahalgintzen dira; ikasketak, ofizio bat ikastea, lanaren munduan sarrera bilatzeko laguntza eskainiz. Familia giro egokia lortu da eta gazteek beren zauriak sendatu eta aurrera egiteko aukera ona izaten dute.
“Ciudad Don Bosco”k Medellineko auzo pobreenetan ere prebentzio lana egiten du, hango ume eta gaztetxoei laguntza eskainiz: eskola errefortzua, psikologoen babesa, gizarte langilea eta dietista izaten dira auzoetako lantaldeetan. Auzo hauetako batzuk arriskutsuak dira, baina jendeak badaki euren umeen aldeko lanean ari garela eta ez digute oztoporik jarri. Proiektuaren atal honi “Amets egiteko eskubidea” programa esaten diote.
Gainera, Juan Inazio, gerrilari izandako gazteen etxean egon da laguntzen, CAPRE edo “Ametsak eraikitzen” programan. Han bizi diren 64 gazteek, 17-18 urte inguruko neska eta mutilek, egoera oso gogorrak bizi izan dituzte, gerrilan edo paramilitarretan. Askori gertuko edo familiako jendea hiltzea esijitu diete. Gazte hauek “erresilientzia” handia daukate, hau da, egoera larrietan ere aurrera egiteko asmoa eta indarra. Euren etorkizuna prestatzen ari dira, ikasketak eta ofizio bat lantzea medio. Lehen pausua gazteak baldintzarik gabe onartzea da eta konfiantza eta konpromisoan heztea, pixkanaka bakea lor dezaten eta aurrera egiteko moduan egon daitezen. Kolonbiako Gobernuak asmoa sendoa dauka gazte hauei aurrera egiten laguntzeko. Adin txikikoak izanik, ez zaie deliturik leporatzen, eta gerrilariak bergizarteratzeko aukerak ematen ari dira. Gazte hauekin izandako esperientzia benetan hunkigarria izan da.
Horretaz gain, Ekuadorreko Cayamben Juan Inaziok salestarrek zuzentzen duten Casa Campesina bisitatu du. Han garapen proiektu ugari lantzen ari dira. Horien artean, Azkoitiko herriak eta udalak diruz laguntzen duten bat: Emakume indigenen nekazaritza ekologikoa. Proiektu hori oso ondo ari da funtzionatzen, eta hango jendearen eskerrona ekarri dugu Azkoitira, eta laguntzen jarraitzeko eskaria.
Cali hirian bizi diren Sudupe familiakoekin ere topaketa atsegin bat izan du Juan Inaziok. Miguel Sudupek familia handia sortu zuen Kolonbian, eta haiek bisitatzeko aukera aprobetxatu du.
Egun hauetan Frantzisko Aita Santua Kolonbian dabil. Hango bake prozesuari laguntza handia emango diola espero dugu. Salestarrak han arriskuan dauden gazteen alde egiten ari diren lana oso ona da. Merezi du guk ere babestea.
Utzi erantzuna