On Bosco Kultur Astearen barruan, Joseina Etxeberria kazetaria izan dugu gure artean, DBHko ikasleei hitzaldi eta saio praktiko bat eskainiz, Floreaga ikastetxeko On Bosco aretoan.
Joseinak hogeita lau urte daramatza irratian lan egiten, eta horrez gain, kolaborazio batzuk egin ditu telebistan eta artikuluak ere idatzi izan ditu hainbat komunikabiderentzat.
Hasieran, bere bizitzari buruz hitz egin digu eta ikasleei azpimarratu die oso garrantzitsua dela bakoitzaren ametsak betetzen saiatzea, barnean sentitzen dugun bokazioaren deiari jarraitzea. Gogoz arituz gero, lanaren sakrifizioz, edozer gauza egiteko gai izan gaitezke. Joseinak ere, hasiera batean, ez zuen pentsatzen kazetaritza munduan, argi zuena zen musika asko gustatzen zitzaiola. Baina, azkenean, erakarpen berezi bat sortu zitzaion kazetaritzarekiko, eta une honetan, maite duen musikaz lan egiten du.
Geroago, irratian erabiltzen diren tramankuluak erakutsi dizkigu eta adibide praktikoak ere jarri: kantuei nola ematen zaien sarrera, abestien nahasketa egiteko erabiltzen dituen programa eta teknikak, jendea erakartzeko jarri behar den intonazioa… Horrekin batera, bere lan egiteko era oso bizia dela komentatu digu, inprobisazioan oinarritzen delako, berak egiten du dena, bai aurkeztu eta bai bolumena igo eta jaitsi. Beraz, momentuan ari da dena sortzen.
Bukaeran abesti bati sarrera emateko gonbidapena luzatu die ikasleei eta Josuk desafioa onartu du, ikasleen aurrean azaltzera ausartu da eta oso ondo egin du, gainera. Eta DBH 4. mailako neska batzuek eskatuta, Ane Aranbarri bere urtebetetzean zoriontzeko aukera ere izan dugu, Joseinaren zuzendaritzapean.
Gaurko hizlariaren hitzak bat datoz ikasturteko honetako kanpainarekin: ausartu, fidatu eta bizi! On Boscok bezala, gure ingurukoen bizitza hobetzeko ahaleginak egin ditzagun, Jainkoak deitzen gaituen bokazioari baietza emanez.
Utzi erantzuna